ಫಿನ್‌ ಕೋರ್‌ ನ್ಯೂಸ್‌ ಡೆಸ್ಕ್: ನೀವು ಖಾಸಗಿ ವಲಯದ ಕಂಪನಿಗಳಲ್ಲಿ ಹೊಸತಾಗಿ ಕೆಲಸಕ್ಕೆ ಸೇರುತ್ತಿದ್ದೀರಾ? ಮೊದಲ ಬಾರಿಗೆ ಉದ್ಯೋಗಕ್ಕೆ ಸೇರಿಕೊಂಡು ಇಪಿಎಫ್‌ಒ ಸೌಲಭ್ಯ ಪಡೆಯುತ್ತಿದ್ದೀರಾ? ಹಾಗಿದ್ದರೆ ನಿಮಗೆ ಇಪಿಎಫ್‌ಒ ವತಿಯಿಂದ 15,000/- ರುಪಾಯಿ ತನಕ ಸಹಾಯಧನ ಸಿಗಬಹುದು. ಇದಕ್ಕೋಸ್ಕರ ವಿಶೇಷ ಯೋಜನೆಯೊಂದಿದೆ. ಅದರ ಹೆಸರು- ಪ್ರಧಾನಮಂತ್ರಿ ವಿಕಸಿತ ಭಾರತ ರೋಜಗಾರ್ ಯೋಜನೆ (PM-VBRY) ಇದರ ಡಿಟೇಲ್ಸ್‌ ನೋಡೋಣ.
ಖಾಸಗಿ ವಲಯದಲ್ಲಿ ಉದ್ಯೋಗಿಗಳ ಭವಿಷ್ಯ ನಿಧಿ ಸಂಸ್ಥೆಯ (EPFO) ವ್ಯಾಪ್ತಿಗೆ ಒಳಪಡುವ ಹೊಸ ಉದ್ಯೋಗಿಗಳಿಗೆ ‘ಪ್ರಧಾನಮಂತ್ರಿ ವಿಕಸಿತ ಭಾರತ ರೋಜಗಾರ್ ಯೋಜನೆ’ (PM-VBRY) ಅಡಿಯಲ್ಲಿ ಗರಿಷ್ಠ ₹15,000 ವರೆಗೆ ಪ್ರೋತ್ಸಾಹಧನ ನೀಡಲಾಗುತ್ತಿದೆ. ಆದರೆ, ಈ ಪೂರ್ಣ ಹಣವನ್ನು ನಿಮ್ಮದಾಗಿಸಿಕೊಳ್ಳಲು EPFO ಸೂಚಿಸಿರುವ ‘ಹಣಕಾಸು ಸಾಕ್ಷರತಾ ಕೋರ್ಸ್’ (Financial Literacy Course) ಅನ್ನು ಕಡ್ಡಾಯವಾಗಿ ಪೂರ್ಣಗೊಳಿಸಬೇಕಾಗುತ್ತದೆ. ಔಪಚಾರಿಕ ಉದ್ಯೋಗ ಕ್ಷೇತ್ರಕ್ಕೆ ಮೊದಲ ಬಾರಿಗೆ ಪಾದಾರ್ಪಣೆ ಮಾಡುವವರಿಗೆ ಆರ್ಥಿಕ ಬೆಂಬಲ ನೀಡಲು ಹಾಗೂ ಹೊಸ ಉದ್ಯೋಗ ಸೃಷ್ಟಿಯನ್ನು ಉತ್ತೇಜಿಸಲು ಸರ್ಕಾರ ಈ ಯೋಜನೆಯನ್ನು ತಂದಿದೆ. ಇದು ಹೇಗೆ ಲಭ್ಯ?
ಎರಡು ಕಂತುಗಳಲ್ಲಿ ಹಣ ಸಂದಾಯ :
ಯೋಜನೆಯ ಭಾಗ ‘ಎ’ (Part A) ಅಡಿಯಲ್ಲಿ ಮೊದಲ ಬಾರಿಗೆ ಕೆಲಸಕ್ಕೆ ಸೇರುವ ಅರ್ಹ ಉದ್ಯೋಗಿಗಳಿಗೆ ಗರಿಷ್ಠ ₹15,000 ಪ್ರೋತ್ಸಾಹಧನವನ್ನು ಎರಡು ಕಂತುಗಳಲ್ಲಿ ನೀಡಲಾಗುತ್ತದೆ: ಉದ್ಯೋಗದಲ್ಲಿ ಸತತ 6 ತಿಂಗಳು ಪೂರ್ಣಗೊಳಿಸಿದ ನಂತರ ಮೊದಲ ಕಂತು ಸಿಗುತ್ತದೆ. 12 ತಿಂಗಳು ಪೂರ್ಣಗೊಳಿಸಿದ ನಂತರ ಹಾಗೂ ನಿಯೋಜಿತ ‘ಹಣಕಾಸು ಸಾಕ್ಷರತಾ ಕೋರ್ಸ್’ ಅನ್ನು ಯಶಸ್ವಿಯಾಗಿ ಮುಗಿಸಿದ ನಂತರ ಎರಡನೇ ಕಂತು ದೊರೆಯುತ್ತದೆ. (ದೀರ್ಘಕಾಲದ ಉಳಿತಾಯ ಅಭ್ಯಾಸವನ್ನು ಪ್ರೋತ್ಸಾಹಿಸಲು ಎರಡನೇ ಕಂತಿನ ಒಂದಷ್ಟು ಭಾಗವನ್ನು ಪ್ರತ್ಯೇಕ ಉಳಿತಾಯ ಖಾತೆಯಲ್ಲಿ ಇಡಲಾಗುತ್ತದೆ).
ಈ ₹15,000 ಪಡೆಯಲು ಅರ್ಹರು ಯಾರು?
ವೇತನ ಮಿತಿ: ಮಾಸಿಕ ಒಟ್ಟು ವೇತನ (Gross Salary) ₹1,00,000 ಗಿಂತ ಕಡಿಮೆ ಇರುವ ಮೊದಲ ಬಾರಿಯ ಉದ್ಯೋಗಿಗಳು. ಸಂಸ್ಥೆ: EPFO ನೋಂದಾಯಿತ ಅಥವಾ ವಿನಾಯಿತಿ ಪಡೆದ (Exempted) ಸಂಸ್ಥೆಗಳ ನೌಕರರಾಗಿರಬೇಕು. ನಿವಾಸಿ ಮತ್ತು ಖಾತೆ: ಭಾರತೀಯ ನಿವಾಸಿಯಾಗಿದ್ದು, ಆಧಾರ್ ಲಿಂಕ್ ಹೊಂದಿರುವ ಬ್ಯಾಂಕ್ ಖಾತೆ ಹೊಂದಿರಬೇಕು. ಗಮನಿಸಿ: ಇದು ಹೊಸದಾಗಿ ಕೆಲಸಕ್ಕೆ ಸೇರಿದವರಿಗೆ ಅನ್ವಯಿಸುತ್ತದೆ. ಆದರೆ ಮಾಲೀಕರು (Employers) ಇದಕ್ಕೆ ಅರ್ಹರಲ್ಲ.
ಹಣಕಾಸು ಸಾಕ್ಷರತಾ ಕೋರ್ಸ್ ಕಡ್ಡಾಯ!
ಎರಡನೇ ಕಂತಿನ ಹಣವನ್ನು ಪಡೆಯಲು ಅರ್ಹರಾಗಲು EPFO Member Portal ನಲ್ಲಿ ಲಭ್ಯವಿರುವ ‘ಹಣಕಾಸು ಸಾಕ್ಷರತಾ ಕೋರ್ಸ್’ ಅನ್ನು ಪೂರ್ಣಗೊಳಿಸುವುದು ಕಡ್ಡಾಯ. 12 ತಿಂಗಳ ಸೇವೆ ಪೂರ್ಣಗೊಳಿಸಿದ ನೌಕರರು ಈ ಕೋರ್ಸ್ ಮುಗಿಸಿದರೆ ಮಾತ್ರ ಎರಡನೇ ಕಂತಿನ ಹಣ ನೌಕರರ ಖಾತೆಗೆ ಜಮೆಯಾಗುತ್ತದೆ.
ಯಾರು ಈ ‘ಮೊದಲ ಬಾರಿಯ ಉದ್ಯೋಗಿ’ (First-Time Employee)?
EPFO ಜಾಲತಾಣದ ಪ್ರಕಾರ, ಕೆಳಗಿನ ಎಲ್ಲಾ ಷರತ್ತುಗಳನ್ನು ಪೂರೈಸುವ ನೌಕರನನ್ನು ಮೊದಲ ಬಾರಿಯ ಉದ್ಯೋಗಿ ಎಂದು ಪರಿಗಣಿಸಲಾಗುತ್ತದೆ:
ಆಗಸ್ಟ್ 1, 2025 ರಿಂದ ಜುಲೈ 7, 2027 ರ ನಡುವೆ ಸಂಸ್ಥೆಗೆ ಕೆಲಸಕ್ಕೆ ಸೇರಿರಬೇಕು. ಆಗಸ್ಟ್ 1, 2025 ಕ್ಕಿಂತ ಮೊದಲು EPFO ಅಥವಾ ವಿನಾಯಿತಿ ಪಡೆದ ಟ್ರಸ್ಟ್‌ನ ಪಿಎಫ್ (PF) ಕೊಡುಗೆದಾರರಾಗಿರಬಾರದು. ಸಂಸ್ಥೆಯಿಂದ ಅವರ ಮೊದಲ ಪಿಎಫ್ ಕೊಡುಗೆಯು ಆಗಸ್ಟ್ 2025 ರ ವೇತನ ತಿಂಗಳಲ್ಲಿ ಅಥವಾ ಆನಂತರ ಜಮೆಯಾಗಿರಬೇಕು.
ಭಾಗ ‘ಬಿ’ (Part B) – ಉದ್ಯೋಗದಾತರಿಗೆ/ಮಾಲೀಕರಿಗೆ ಪ್ರೋತ್ಸಾಹಧನ :
ಹೊಸ ಉದ್ಯೋಗಿಗಳನ್ನು ನೇಮಿಸಿಕೊಳ್ಳುವ ಕಂಪನಿಗಳಿಗೂ ಸಹ ಈ ಯೋಜನೆಯಡಿ ಪ್ರೋತ್ಸಾಹಧನ ಸಿಗಲಿದೆ. ಅರ್ಹ ಹೊಸ ನೌಕರನನ್ನು ನೇಮಿಸಿಕೊಂಡರೆ ಕಂಪನಿಗೆ ಪ್ರತಿ ತಿಂಗಳು, ಪ್ರತಿ ನೌಕರನಿಗೆ ₹3,000 ವರೆಗೆ ಪ್ರೋತ್ಸಾಹಧನ ಸಿಗುತ್ತದೆ. ಸಾಮಾನ್ಯ ಕ್ಷೇತ್ರಗಳ ಸಂಸ್ಥೆಗಳಿಗೆ 2 ವರ್ಷಗಳ ಕಾಲ ಮತ್ತು ಉತ್ಪಾದನಾ ವಲಯದ (Manufacturing sector) ಸಂಸ್ಥೆಗಳಿಗೆ 4 ವರ್ಷಗಳ ಕಾಲ ಈ ಸೌಲಭ್ಯ ದೊರೆಯುತ್ತದೆ. ನೇಮಕಾತಿ ನಿಯಮ: 50 ಕ್ಕಿಂತ ಕಡಿಮೆ ನೌಕರರಿರುವ ಸಂಸ್ಥೆಗಳು ಕನಿಷ್ಠ 2 ಹೆಚ್ಚುವರಿ ನೌಕರರನ್ನು ಹಾಗೂ 50 ಕ್ಕಿಂತ ಹೆಚ್ಚು ನೌಕರರಿರುವ ಸಂಸ್ಥೆಗಳು ಕನಿಷ್ಠ 2 ಹೆಚ್ಚುವರಿ ನೌಕರರನ್ನು ಹೊಸದಾಗಿ ನೇಮಿಸಿಕೊಳ್ಳುವುದು ಕಡ್ಡಾಯ.
