ಗೋಲ್ಡ್‌ ಫಂಡ್‌ ಆಫ್‌ ಫಂಡ್‌ ಹೊಸ ಹೂಡಿಕೆ ಸ್ಥಗಿತ ಕಾರಣವೇನು? ಪರಿಣಾಮ?

ಫಿನ್‌ ಕೋರ್‌ ನ್ಯೂಸ್‌ ಡೆಸ್ಕ್:‌ ಹಬ್ಬದ ಸೀಸನ್‌ಗೂ ಮುನ್ನ ಈ ಸಲ ಟಾಟಾಟ ಮ್ಯೂಚುಯಲ್ ಫಂಡ್ , ಎಚ್‌ಡಿಎಫ್‌ಸಿ ಮ್ಯೂಚುಯಲ್ ಫಂಡ್  ಮತ್ತು ಐಸಿಐಸಿಐ ಪ್ರುಡೆನ್ಶಿಯಲ್ ಆಸೆಟ್ ಮ್ಯಾನೇಜ್‌ಮೆಂಟ್ ಕಂಪನಿಗಳಂತಹ ಪ್ರಮುಖ ಸಂಸ್ಥೆಗಳು ತಮ್ಮ ‘ಚಿನ್ನದ ಫಂಡ್ ಆಫ್ ಫಂಡ್ಸ್’ (Gold FoFs) ಯೋಜನೆಗಳಲ್ಲಿ ಹೊಸ ಹೂಡಿಕೆಗಳನ್ನು ತಾತ್ಕಾಲಿಕವಾಗಿ ಸ್ಥಗಿತಗೊಳಿಸಿ ನೋಟಿಸ್ ಹೊರಡಿಸಿವೆ.

ಹೀಗೆ ಹೊಸ ಹೂಡಿಕೆಯನ್ನು ತಡೆಹಿಡಿದಿರುವುದರಿಂದ ಈಗಾಗಲೇ ಹೂಡಿಕೆ ಮಾಡಿರುವವರ ಮೇಲೆ ಏನು ಪರಿಣಾಮ ಬೀರುತ್ತದೆ? ಹಾಗೆಯೇ, ಈ ಫಂಡ್‌ಗಳಲ್ಲಿ ಹೊಸದಾಗಿ ಹೂಡಿಕೆ ಮಾಡಲು ಬಯಸಿದ್ದ ಹೊಸ ಹೂಡಿಕೆದಾರರಿಗೆ ಇರುವ ಪರ್ಯಾಯ ಮಾರ್ಗಗಳೇನು? ವಿವರಗಳನ್ನು ನೋಡೋಣ.

ಹೊಸ ಹೂಡಿಕೆ ತಡೆಯ ಕುರಿತು ಟಾಟಾ ಮ್ಯೂಚುಯಲ್ ಫಂಡ್ ಹೇಳಿದ್ದೇನು?

ಟಾಟಾ ಮ್ಯೂಚುಯಲ್ ಫಂಡ್ ತನ್ನ ‘ಟಾಟಾ ಗೋಲ್ಡ್ ಇಟಿಎಫ್ ಫಂಡ್ ಆಫ್ ಫಂಡ್’  ಯೋಜನೆಯಲ್ಲಿ ಹೊಸ ಮತ್ತು ಹೆಚ್ಚುವರಿ ಲಂಪ್‌ಸಮ್ (ಒಂದೇ ಬಾರಿಯ) ಹೂಡಿಕೆಗಳು, ಸ್ವಿಚ್-ಇನ್ , ಟಾಪ್-ಅಪ್ ಹಾಗೂ ಹೊಸ ಎಸ್‌ಐಪಿ (SIP) ಮತ್ತು ಎಸ್‌ಟಿಪಿ (STP) ನೋಂದಣಿಗಳನ್ನು ಅಕ್ಟೋಬರ್ 16 ರಿಂದ ತಾತ್ಕಾಲಿಕವಾಗಿ ನಿಯಂತ್ರಿಸಲಾಗಿದೆ ಎಂದು ತಿಳಿಸಿದೆ. ಹೀಗಿದ್ದರೂ, ಈಗಾಗಲೇ ಚಾಲ್ತಿಯಲ್ಲಿರುವ ಎಸ್‌ಐಪಿ/ಎಸ್‌ಟಿಪಿ ಹೂಡಿಕೆಗಳು, ರಿಡೆಂಪ್ಶನ್ (ಹಣ ಹಿಂಪಡೆಯುವಿಕೆ), ಸ್ವಿಚ್-ಔಟ್ ಮತ್ತು ಎಸ್‌ಡಬ್ಲ್ಯೂಪಿ (SWP) ನಿಯಮಿತವಾಗಿ ಮುಂದುವರಿಯಲಿವೆ ಎಂದು ಫಂಡ್ ಹೌಸ್ ಸ್ಪಷ್ಟಪಡಿಸಿದೆ.

ಹೊಸ ಹೂಡಿಕೆಯನ್ನು ಹಠಾತ್ ಸ್ಥಗಿತಗೊಳಿಸಲು ಕಾರಣವೇನು?

ಇಂಡಿಯಾ ಬುಲಿಯನ್ ಮತ್ತು ಜ್ಯುವೆಲರ್ಸ್ ಅಸೋಸಿಯೇಷನ್ ಲಿಮಿಟೆಡ್ (IBJA) ನ ಅಧ್ಯಕ್ಷರಾದ ಪೃಥ್ವಿರಾಜ್ ಕೊಠಾರಿ ಅವರ ಪ್ರಕಾರ, “ಈ ನಿರ್ಧಾರಕ್ಕೆ ದೇಶದಲ್ಲಿ ಚಿನ್ನದ ಅಭಾವ ಕಾರಣವಲ್ಲ, ಬದಲಿಗೆ ಜಾಗತಿಕ ಮ್ಯಾಕ್ರೋ-ಎಕನಾಮಿಕ್ (Macroeconomic) ಕಾರಣಗಳು ಪ್ರಮುಖವಾಗಿವೆ.”

ಇತ್ತೀಚೆಗೆ 2026 ಅಕ್ಟೋಬರ್ 9 ರಂದು ಡಾಲರ್ ಎದುರು ರೂಪಾಯಿ ಮೌಲ್ಯ ಸುಮಾರು ₹96.7 ಕ್ಕೆ ಕುಸಿದಿತ್ತು. ಭಾರತವು ಭಾರಿ ಪ್ರಮಾಣದಲ್ಲಿ ಆಮದು ಮಾಡಿಕೊಳ್ಳುವ ವಸ್ತುಗಳಲ್ಲಿ ಚಿನ್ನವೂ ಒಂದಾಗಿದೆ.

ಸೆಪ್ಟೆಂಬರ್ ತಿಂಗಳಿನಲ್ಲಿ ಗೋಲ್ಡ್ ಇಟಿಎಫ್‌ಗಳ ಹೂಡಿಕೆ %71 ರಷ್ಟು ಹೆಚ್ಚಾಗಿ ಬರೋಬ್ಬರಿ ₹4,451 ಕೋಟಿಗೆ ತಲುಪಿತ್ತು. ಹಬ್ಬದ ಸಮಯದಲ್ಲಿ ದೇಶದಿಂದ ವಿದೇಶಿ ವಿನಿಮಯ (ಡಾಲರ್) ಹೊರಹೋಗುವುದನ್ನು ಕಡಿಮೆ ಮಾಡಲು ಮತ್ತು ರೂಪಾಯಿ ಮೌಲ್ಯದ ಮೇಲಿನ ಒತ್ತಡವನ್ನು ತಗ್ಗಿಸಲು ‘ಸೆಬಿ’ (SEBI) ನೀಡಿದ ಸೂಚನೆಯಂತೆ ‘ಆಂಫಿ’ (AMFI) ಮೂಲಕ ಫಂಡ್ ಸಂಸ್ಥೆಗಳು ಈ ಕ್ರಮ ಕೈಗೊಂಡಿವೆ ಎಂದು ಉದ್ಯಮದ ತಜ್ಞರು ತಿಳಿಸಿದ್ದಾರೆ.

ಅನಂದ್ ರಾಠಿ ವೆಲ್ತ್ ಸಂಸ್ಥೆಯ ಕಾರ್ಯನಿರ್ವಾಹಕ ನಿರ್ದೇಶಕ ಆದಿಲ್ ಚಾಕೋ ಮಾತನಾಡಿ, ಈ ಕ್ರಮವು ಚಿನ್ನದ ಮೇಲಿನ ಬೇಡಿಕೆಯನ್ನು ಸದ್ಯಕ್ಕೆ ಸರಿದೂಗಿಸಲು ಮತ್ತು ಭಾರತದ ಆಮದು ವೆಚ್ಚವನ್ನು ಕಂಟ್ರೋಲ್‌ನಲ್ಲಿಡಲು ನೆರವಾಗಲಿದೆ ಎಂದಿದ್ದಾರೆ.

ಹಾಗಾದರೆ ಟಾಟಾ, HDFC, ICICI ಫಂಡ್‌ಗಳ ಇತರ ಗೋಲ್ಡ್ ಸ್ಕೀಮ್‌ಗಳಲ್ಲೂ ಹೂಡಿಕೆ ಮಾಡಲು ಸಾಧ್ಯವಿಲ್ಲವೇ?

ಖಂಡಿತ ಮಾಡಬಹುದು. ಮ್ಯೂಚುಯಲ್ ಫಂಡ್ ಸಂಸ್ಥೆಗಳು ಕೇವಲ ಗೋಲ್ಡ್ ‘ಫಂಡ್ ಆಫ್ ಫಂಡ್ಸ್’ (FoFs) ಯೋಜನೆಗಳಲ್ಲಿ ಮಾತ್ರ ಹೊಸ ಹೂಡಿಕೆಯನ್ನು ತಡೆಹಿಡಿದಿವೆ.

ಆದರೆ, ಈ FoF ಗಳು ಹೂಡಿಕೆ ಮಾಡುವ ಮೂಲ ‘ಗೋಲ್ಡ್ ಇಟಿಎಫ್‌ಗಳು’ (Gold ETFs) ಷೇರು ಮಾರುಕಟ್ಟೆಯಲ್ಲಿ (Stock Exchanges) ಎಂದಿನಂತೆ ವಹಿವಾಟು ನಡೆಸುತ್ತಿವೆ. ಆದ್ದರಿಂದ ಹೂಡಿಕೆದಾರರು ನೇರವಾಗಿ ಇಟಿಎಫ್‌ಗಳ ಮೂಲಕ ಚಿನ್ನವನ್ನು ಖರೀದಿಸಬಹುದು ಎಂದು ಆದಿಲ್ ಚಾಕೋ ವಿವರಿಸಿದ್ದಾರೆ.

ಈಗಾಗಲೇ FoF ಗಳಲ್ಲಿ ಹೂಡಿಕೆ ಮಾಡಿರುವ ಹಳೆಯ ಹೂಡಿಕೆದಾರರ ಕಥೆಯೇನು?

ಪೃಥ್ವಿರಾಜ್ ಕೊಠಾರಿ ಅವರ ಪ್ರಕಾರ, ಈಗಾಗಲೇ ಹೂಡಿಕೆ ಮಾಡಿರುವವರಿಗೆ ಯಾವುದೇ ತೊಂದರೆಯಿಲ್ಲ. ಕಟ್-ಆಫ್ ದಿನಾಂಕಕ್ಕಿಂತ ಮೊದಲು ನೋಂದಾಯಿಸಲಾದ SIP, STP ಮತ್ತು ಸ್ವಿಚ್‌ಗಳು ನಿಗದಿತ ಸಮಯಕ್ಕೆ ಸರಿಯಾಗಿ ಮುಂದುವರಿಯುತ್ತವೆ. ನಿಮ್ಮ ಯುನಿಟ್‌ಗಳು ಸುರಕ್ಷಿತವಾಗಿ ಹೂಡಿಕೆಯಾಗಿಯೇ ಇರುತ್ತವೆ. FoF ನ ಎನ್‌ಎವಿ (NAV) ಮುಕ್ತ ಮಾರುಕಟ್ಟೆಯ ಚಿನ್ನದ ದರಕ್ಕೆ ತಕ್ಕಂತೆ ಬದಲಾಗುತ್ತಿರುತ್ತದೆ. ಹಾಗಾಗಿ ಹಳೆಯ ಹೂಡಿಕೆದಾರರ ಹಣದ ಮೌಲ್ಯಕ್ಕೆ ಯಾವುದೇ ಧಕ್ಕೆ ಬರುವುದಿಲ್ಲ ಎಂದು ‘ಅಕೋಯಿರಾ ಬೈ ಅಗ್‌ಮಾಂಟ್’ ನ ನಿರ್ದೇಶಕ ಆರವ್ ಬಫ್ನಾ ಸ್ಪಷ್ಟಪಡಿಸಿದ್ದಾರೆ.

ಈ FoF ಗಳಲ್ಲಿ ಹೂಡಿಕೆ ಮಾಡಲು ಬಯಸಿದ್ದ ಹೊಸ ಹೂಡಿಕೆದಾರರಿಗೆ ಪರ್ಯಾಯ ಮಾರ್ಗಗಳೇನು?

ಈ ನಿಯಂತ್ರಣವು ಜಾರಿಯಲ್ಲಿರುವವರೆಗೆ ಹೊಸ ಹೂಡಿಕೆದಾರರು ಈ ನಿರ್ದಿಷ್ಟ ಗೋಲ್ಡ್ FoF ಗಳಲ್ಲಿ ಹೊಸದಾಗಿ ಹಣ ಹೂಡಿಕೆ ಮಾಡಲು ಸಾಧ್ಯವಿಲ್ಲ. ಅಂತಹ ಹೂಡಿಕೆದಾರರು ಚಿನ್ನದಲ್ಲಿ ಹೂಡಿಕೆ ಮಾಡಲು ಕೆಳಗಿನ ಪರ್ಯಾಯ ಮಾರ್ಗಗಳನ್ನು ಬಳಸಬಹುದು:

ಗೋಲ್ಡ್ ಇಟಿಎಫ್‌ಗಳು (Gold ETFs): NSE ಅಥವಾ BSE ಷೇರು ಮಾರುಕಟ್ಟೆಗಳಲ್ಲಿ ನೇರವಾಗಿ ಇಟಿಎಫ್‌ಗಳನ್ನು  ಖರೀದಿಸಬಹುದು. ಇದಕ್ಕೆ ಕೇವಲ ಡಿಮ್ಯಾಟ್ ಮತ್ತು ಟ್ರೇಡಿಂಗ್ ಖಾತೆ ಇದ್ದರೆ ಸಾಕು. ಮಾರುಕಟ್ಟೆಯಲ್ಲಿ ಖರೀದಿದಾರರು ಮತ್ತು ಮಾರಾಟಗಾರರ ನಡುವೆ ವಹಿವಾಟು ನಡೆಯುವುದರಿಂದ, ಇದರಿಂದ ಫಂಡ್ ಸಂಸ್ಥೆಗಳು ಹೊಸದಾಗಿ ಚಿನ್ನವನ್ನು ಆಮದು ಮಾಡಿಕೊಳ್ಳುವ ಅಗತ್ಯವಿರುವುದಿಲ್ಲ.

ಸಾವರಿನ್ ಗೋಲ್ಡ್ ಬಾಂಡ್‌ಗಳು (SGBs): ಸೆಕೆಂಡರಿ ಮಾರುಕಟ್ಟೆಯಿಂದ (Secondary Market) ಸಾವರಿನ್ ಗೋಲ್ಡ್ ಬಾಂಡ್‌ಗಳನ್ನು ખરીದಿಸಬಹುದು.

ಎಲೆಕ್ಟ್ರಾನಿಕ್ ಗೋಲ್ಡ್ ರಿಸೀಪ್ಟ್‌ಗಳು (EGRs): ಷೇರು ಮಾರುಕಟ್ಟೆಯಲ್ಲಿ ಲಭ್ಯವಿರುವ ಇಜಿಆರ್‌ಗಳ ಮೇಲೆ ಹೂಡಿಕೆ ಮಾಡಬಹುದು.

ಭೌತಿಕ ಹಾಗೂ ಡಿಜಿಟಲ್ ಚಿನ್ನ: ಮಾನ್ಯತೆ ಪಡೆದ ಶುದ್ಧೀಕರಣ ಸಂಸ್ಥೆಗಳಿಂದ (Refiners) ನಾಣ್ಯ/ಬಾರ್‌ಗಳು ಅಥವಾ ‘ಡಿಜಿಟಲ್ ಗೋಲ್ಡ್’ (Digital Gold) ಅನ್ನು ಖರೀದಿಸಬಹುದು.