ಜಿಯೋ ಪ್ಲಾಟ್‌ಫಾರ್ಮ್ಸ್ ತನ್ನ ಐಪಿಒ (ಆರಂಭಿಕ ಸಾರ್ವಜನಿಕ ಕೊಡುಗೆ) ಮುಕ್ತಾಯದ ದಿನದಂದು ಅಂದರೆ ಅಕ್ಟೋಬರ್ 23ರೊಳಗೆ ಬರೋಬ್ಬರಿ 1 ಕೋಟಿಗೂ ಅಧಿಕ ಅರ್ಜಿಗಳನ್ನು ಪಡೆದುಕೊಳ್ಳುವ ಮೂಲಕ ಹೂಡಿಕೆದಾರರ ಭಾಗವಹಿಸುವಿಕೆಯಲ್ಲಿ ಜಾಗತಿಕ ದಾಖಲೆ ಬರೆದಿದೆ. ಶುಕ್ರವಾರ ಮಧ್ಯಾಹ್ನ 12:36ರ ಸುಮಾರಿಗೆ ₹30,213 ಕೋಟಿ ಮೊತ್ತದ ಈ ಐಪಿಒ 7.49 ಪಟ್ಟು ಸಬ್ಸ್ಕ್ರೈಬ್ ಆಗಿದ್ದು, ಅರ್ಹ ಸಾಸ್ಥಿಕ ಖರೀದಿದಾರರು (QIBs) ಹಾಗೂ ಸಾಂಸ್ಥಿಕೇತರ ಹೂಡಿಕೆದಾರರಿಂದ (NIIs) ಭರ್ಜರಿ ಬೇಡಿಕೆ ವ್ಯಕ್ತವಾಗಿದೆ.
ಅಕ್ಟೋಬರ್ 23ರಂದು ಮಧ್ಯಾಹ್ನ 12:40ರ ವೇಳೆಗೆ, ಜಿಯೋ ಪ್ಲಾಟ್‌ಫಾರ್ಮ್ಸ್ ಐಪಿಒ ಮಾರಾಟಕ್ಕಿದ್ದ 19.75 ಕೋಟಿ ಷೇರುಗಳಿಗೆ 7.5 ಪಟ್ಟು ಬಿಡ್‌ಗಳನ್ನು ಪಡೆದುಕೊಂಡಿದೆ.
ವಿವಿಧ ವಿಭಾಗಗಳಲ್ಲಿ ಬೇಡಿಕೆ ಹೇಗಿದೆ?
ಅರ್ಹ ಸಾಸ್ಥಿಕ ಖರೀದಿದಾರರು (QIBs): ಈ ವಿಭಾಗದಲ್ಲಿ ಬೇಡಿಕೆ ಮುಂಚೂಣಿಯಲ್ಲಿದ್ದು, ಮೀಸಲಿಟ್ಟ 4.9 ಕೋಟಿ ಷೇರುಗಳಿಗೆ ಪ್ರತಿಯಾಗಿ 79.75 ಕೋಟಿ ಷೇರುಗಳಿಗೆ ಬಿಡ್ ಮಾಡಲಾಗಿದೆ. ಇದರೊಂದಿಗೆ ಈ ವಿಭಾಗವು ಬರೋಬ್ಬರಿ 16.27 ಪಟ್ಟು ಸಬ್ಸ್ಕ್ರೈಬ್ ಆಗಿದೆ.
ಸಾಂಸ್ಥಿಕೇತರ ಹೂಡಿಕೆದಾರರು (NIIs): ಈ ವಿಭಾಗದಲ್ಲಿ 3.64 ಕೋಟಿ ಷೇರುಗಳಿಗೆ 38.04 ಕೋಟಿ ಷೇರುಗಳಿಗಾಗಿ ಬಿಡ್ ಸಲ್ಲಿಕೆಯಾಗಿದ್ದು, ಇದು 10.44 ಪಟ್ಟು ಚಂದಾದಾರಿಕೆ ಪಡೆದಿದೆ.
ಚಿಲ್ಲರೆ ಹೂಡಿಕೆದಾರರು (Retail Investors): ಚಿಲ್ಲರೆ ಹೂಡಿಕೆದಾರರಿಗಾಗಿ ಮೀಸಲಿಟ್ಟ 8.5 ಕೋಟಿ ಷೇರುಗಳಿಗೆ 18.18 ಕೋಟಿ ಷೇರುಗಳಿಗೆ ಬಿಡ್ ಬಿದ್ದಿದ್ದು, ಇದು 2.14 ಪಟ್ಟು ಸಬ್ಸ್ಕ್ರೈಬ್ ಆಗಿದೆ.
ಮೈಲಿಗಲ್ಲುಗಳು ಮತ್ತು ಪ್ರಮುಖ ಮುಖ್ಯಾಂಶಗಳು:
ಈ ಹಿಂದೆ ವಾರಿ ಎನರ್ಜಿಸ್ (Waaree Energies) ಸುಮಾರು 97 ಲಕ್ಷ ಅರ್ಜಿಗಳನ್ನು ಪಡೆದುಕೊಂಡಿದ್ದೇ ದಾಖಲೆಯಾಗಿತ್ತು. ಈಗ ಜಿಯೋ ಪ್ಲಾಟ್‌ಫಾರ್ಮ್ಸ್ ಆ ದಾಖಲೆಯನ್ನು ಮುರಿದು ಮುನ್ನಡೆದಿದೆ. ಬಜಾಜ್ ಹೌಸಿಂಗ್ ಫೈನಾನ್ಸ್ ಮತ್ತು ಭಾರತ Coking Coal Ltd ತಲಾ ಸುಮಾರು 90 ಲಕ್ಷ ಅರ್ಜಿಗಳನ್ನು ಪಡೆದು ಈ ಪಟ್ಟಿಯಲ್ಲಿ ಮುಂದಿದ್ದವು. ಐಪಿಒ ಮುಕ್ತಾಯಗೊಳ್ಳುವಷ್ಟರಲ್ಲಿ ಅಂತಿಮ ಅರ್ಜಿಗಳ ಸಂಖ್ಯೆ ಇನ್ನಷ್ಟು ಹೆಚ್ಚಾಗುವ ಸಾಧ್ಯತೆಯಿದೆ.
ಬುಧವಾರ ಐಪಿಒ ಆರಂಭವಾದ ಕೇವಲ 100 ನಿಮಿಷಗಳಲ್ಲಿ ಸಂಪೂರ್ಣ ಸಬ್ಸ್ಕ್ರೈಬ್ ಆಗುವ ಮೂಲಕ, ಇದು ಭಾರತದಲ್ಲಿ ಅತಿವೇಗವಾಗಿ ಪೂರ್ಣ ಪ್ರಮಾಣದ ಚಂದಾದಾರಿಕೆ ಪಡೆದ ಮೆಗಾ ಪಬ್ಲಿಕ್ ಇಶ್ಯೂ ಎಂಬ ಖ್ಯಾತಿಗೂ ಪಾತ್ರವಾಯಿತು.
ಜಿಯೋ ಪ್ಲಾಟ್‌ಫಾರ್ಮ್ಸ್, ಗರಿಷ್ಠ ಬೆಲೆ ಶ್ರೇಣಿಯಲ್ಲಿ (₹1,065 – ₹1,119) 212 ಆಂಕರ್ ಹೂಡಿಕೆದಾರರಿಗೆ ₹8,109.85 ಕೋಟಿ ಮೌಲ್ಯದ ಷೇರುಗಳನ್ನು ಹಂಚಿಕೆ ಮಾಡಿದೆ. ಆಂಕರ್ ಬುಕ್‌ನಲ್ಲಿ ಬೇಡಿಕೆ ₹2.5 ಲಕ್ಷ ಕೋಟಿ ತಲುಪಿತ್ತು (ಲಭ್ಯವಿರುವ ಪ್ರಮಾಣಕ್ಕಿಂತ 30 ಪಟ್ಟು ಹೆಚ್ಚು).
ಒಟ್ಟಾರೆ ಈ ಐಪಿಒಗೆ ಸಂಬಂಧಿಸಿದಂತೆ ಆಂಕರ್ ಬುಕ್‌ನಿಂದ ₹2.5 ಲಕ್ಷ ಕೋಟಿ ಹಾಗೂ ಸಾರ್ವಜನಿಕ ಬಿಡ್‌ಗಳಿಂದ ₹1..7 ಲಕ್ಷ ಕೋಟಿ ಸೇರಿದಂತೆ ಒಟ್ಟು ಬೇಡಿಕೆ ಬರೋಬ್ಬರಿ ₹4.2 ಲಕ್ಷ ಕೋಟಿಗಳನ್ನು ಮುಟ್ಟಿದೆ.
ಜಿಯೋ ಐಪಿಒ ಚಂದಾದಾರಿಕೆ ಅಕ್ಟೋಬರ್ 23ರಂದು ಮುಕ್ತಾಯಗೊಂಡಿದ್ದು, ಅಕ್ಟೋಬರ್ 28ರಂದು ಷೇರುಗಳು ಮಾರುಕಟ್ಟೆಯಲ್ಲಿ ಲಿಸ್ಟ್ (Listing) ಆಗುವ ನಿರೀಕ್ಷೆಯಿದೆ.
