ಫಿನ್‌ ಕೋರ್‌ ನ್ಯೂಸ್‌ ಡೆಸ್ಕ್: ಭಾರತೀಯ ಜೀವವಿಮಾ ನಿಗಮವು (LIC) ತನ್ನ ಗ್ರಾಹಕರಿಗೆ ಮತ್ತಷ್ಟು ಉತ್ತಮ ಆರ್ಥಿಕ ಹಾಗೂ ಆರೋಗ್ಯ ರಕ್ಷಣೆಯನ್ನು ಒದಗಿಸುವ ನಿಟ್ಟಿನಲ್ಲಿ ಮೂರು ಹೊಸ ವಿಮಾ ಉತ್ಪನ್ನಗಳನ್ನು ಮಾರುಕಟ್ಟೆಗೆ ಪರಿಚಯಿಸುತ್ತಿದೆ. ಅಕ್ಟೋಬರ್ 13, 2026 ರಂದು ಬಾಂಬೆ ಸ್ಟಾಕ್ ಎಕ್ಸ್ಚೇಂಜ್ (BSE) ಗೆ ನೀಡಿದ ವಿವರಗಳ ಪ್ರಕಾರ, ಈ ಹೊಸ ಯೋಜನೆಗಳು ಅಕ್ಟೋಬರ್ 19, 2026 ರಿಂದ ದೇಶಾದ್ಯಂತ ಅಧಿಕೃತವಾಗಿ ಲಭ್ಯವಿರಲಿವೆ. ಪಾಲಿಸಿದಾರರಿಗೆ ಪಿಂಚಣಿ, ಕ್ಯಾನ್ಸರ್ ಕವರ್ ಮತ್ತು ಹೆಲ್ತ್ ಇನ್ಷೂರೆನ್ಸ್‌ ನೀಡುವ ಉದ್ದೇಶವನ್ನು ಇವುಗಳು ಒಳಗೊಂಡಿವೆ.
ಈ ಹೊಸ ಕೊಡುಗೆಗಳು ಸಂಪೂರ್ಣವಾಗಿ ನಾನ್- ಪಾರ್ಟಿಸಿಪೇಟಿಂಗ್‌ ನಾನ್ ಲಿಂಕ್ಡ್ ವರ್ಗದಡಿಯಲ್ಲಿ ಬರಲಿದ್ದು, ನಿವೃತ್ತಿ ಯೋಜನೆ, ಆರೋಗ್ಯ ಸಂರಕ್ಷಣೆ ಮತ್ತು ಕ್ಯಾನ್ಸರ್‌ನಂತಹ ನಿರ್ದಿಷ್ಟ ಕಾಯಿಲೆಗಳ ವಿರುದ್ಧ ವಿಮೆಯ ಭದ್ರತೆ ಬಯಸುವವರಿಗೆ ಉಪಯುಕ್ತವಾಗಿವೆ. ಬಿಡುಗಡೆಯಾಗಲಿರುವ ಮೂರು ಪ್ರಮುಖ ಯೋಜನೆಗಳ ವಿವರಗಳನ್ನು ಈಗ ನೋಡೋಣ.
ಎಲ್ಐಸಿ ಯ ಹೊಸ ಜೀವನ್ ಧರಾ – II (LIC’s New Jeevan Dhara – II)
ವರ್ಗ: ವೈಯಕ್ತಿಕ ಉಳಿತಾಯ ಹಾಗೂ ಮುಂದೂಡಲ್ಪಟ್ಟ ಆನ್ಯುಯಿಟಿ (Deferred Annuity) ಯೋಜನೆ.
ವಿಶೇಷತೆ: ಇದು ನಿವೃತ್ತಿಯ ನಂತರದ ಆರ್ಥಿಕ ಭದ್ರತೆಗಾಗಿ ರೂಪಿಸಲಾದ ಅತ್ಯುತ್ತಮ ಉತ್ಪನ್ನವಾಗಿದೆ. ಪಾಲಿಸಿದಾರರು ನಿವೃತ್ತಿಗೆ ಮುಂಚಿನ ನಿರ್ದಿಷ್ಟ ಅವಧಿಯಲ್ಲಿ (Accumulation phase) ಹಣವನ್ನು ಹೂಡಿಕೆ ಮಾಡಿ ಸಂಗ್ರಹಿಸಬಹುದು. ನಿವೃತ್ತಿಯ ಹಂತದಲ್ಲಿ (Distribution phase) ಪ್ರತಿ ತಿಂಗಳು ಅಥವಾ ನಿಯಮಿತವಾಗಿ ಖಚಿತವಾದ ಪಿಂಚಣಿ (Annuity Payouts) ಪಡೆಯಲು ಇದು ಅವಕಾಶ ಕಲ್ಪಿಸುತ್ತದೆ.
=================
ಎಲ್ಐಸಿ ಯ ಹೆಲ್ತ್ ಶೀಲ್ಡ್ (LIC’s Health Shield)
ವರ್ಗ: ವೈಯಕ್ತಿಕ ಆರೋಗ್ಯ ವಿಮೆ ಹಾಗೂ ಶುದ್ಧ ರಕ್ಷಣಾತ್ಮಕ (Pure Risk) ಯೋಜನೆ.
ವಿಶೇಷತೆ: ಇದು ಕೇವಲ ಬಿಲ್ ಮರುಪಾವತಿ ಮಾಡುವುದಷ್ಟೇ ಅಲ್ಲದೆ, ವೈದ್ಯಕೀಯ ತುರ್ತು ಸಂದರ್ಭಗಳಲ್ಲಿ ಮತ್ತು ನಿಗದಿತ ಆರೋಗ್ಯ ಬಿಕ್ಕಟ್ಟುಗಳಲ್ಲಿ ಸ್ಥಿರವಾದ ಆರ್ಥಿಕ ಪ್ರಯೋಜನಗಳನ್ನು (Fixed Health Benefits) ಒದಗಿಸುತ್ತದೆ.
ಇದರಲ್ಲಿ ದೈನಂದಿನ ಆಸ್ಪತ್ರೆ ನಗದು ಸೌಲಭ್ಯ ಹಾಗೂ ಪ್ರಮುಖ ಕಾಯಿಲೆಗಳಿಗೆ ದೊಡ್ಡ ಮೊತ್ತದ (Lump-sum) ಪರಿಹಾರದ ಸೌಲಭ್ಯವಿರುತ್ತದೆ.
===============
ಎಲ್ಐಸಿ ಯ ಹೊಸ ಕ್ಯಾನ್ಸರ್ ಕವರ್ (LIC’s New Cancer Cover)ವರ್ಗ: ವೈಯಕ್ತಿಕ ಆರೋಗ್ಯ ವಿಮೆ ಹಾಗೂ ಶುದ್ಧ ರಕ್ಷಣಾತ್ಮಕ (Pure Risk) ಯೋಜನೆ.
ವಿಶೇಷತೆ: ಇದು ಇಂದಿನ ಆಧುನಿಕ ಜೀವನಶೈಲಿಯಲ್ಲಿ ಹೆಚ್ಚುತ್ತಿರುವ ಕ್ಯಾನ್ಸರ್ ನಂತಹ ಮಾರಕ ಕಾಯಿಲೆಯನ್ನು ಗುರಿಯಾಗಿಸಿಕೊಂಡು ರೂಪಿಸಿರುವ ವಿಶೇಷ ವಿಮಾ ಪಾಲಿಸಿಯಾಗಿದೆ. ಕ್ಯಾನ್ಸರ್ ರೋಗವು ಆರಂಭಿಕ ಅಥವಾ ಮುಂದುವರಿದ ಹಂತದಲ್ಲಿ ಪತ್ತೆಯಾದಾಗ, ಚಿಕಿತ್ಸಾ ವೆಚ್ಚವನ್ನು ಸರಿದೂಗಿಸಲು ಇದು ಆರ್ಥಿಕ ನೆರವು ನೀಡುತ್ತದೆ.
ಈ ಮೂರು ವಿಮಾ ಯೋಜನೆಗಳು ಅಕ್ಟೋಬರ್ 19, 2026 ರಿಂದ ಎಲ್ಐಸಿ ಅಧಿಕೃತ ವೆಬ್‌ಸೈಟ್ ಮೂಲಕ ಆನ್‌ಲೈನ್‌ನಲ್ಲಿ ಹಾಗೂ ಅಧಿಕೃತ ಏಜೆಂಟ್‌ಗಳು ಮತ್ತು ಕಾರ್ಪೊರೇಟ್ ದಲ್ಲಾಳಿಗಳ (Brokers) ಮೂಲಕ ಆಫ್‌ಲೈನ್‌ನಲ್ಲಿಯೂ ಮಾರಾಟಕ್ಕೆ ಸಿಗಲಿವೆ.
ಪ್ರಸ್ತುತ ಬಿಎಸ್ಇಗೆ ನೀಡಿರುವ ಪ್ರಾಥಮಿಕ ಮಾಹಿತಿಯಲ್ಲಿ ಕೇವಲ ಯೋಜನೆಗಳ ಹೆಸರು ಮತ್ತು ವರ್ಗಗಳನ್ನು ಮಾತ್ರ ಪ್ರಕಟಿಸಲಾಗಿದೆ. ಪ್ರೀಮಿಯಂ ಮೊತ್ತ, ಅರ್ಹತಾ ವಯಸ್ಸು, ಪಾಲಿಸಿ ಅವಧಿ ಮತ್ತು ವಿನಾಯಿತಿಗಳ (Exclusions) ಕುರಿತಾದ ಸಂಪೂರ್ಣ ವಿವರಗಳನ್ನು ತಿಳಿಯಲು ಗ್ರಾಹಕರು ಬಿಡುಗಡೆಯಾದ ಬಳಿಕ ಆಯಾ ಅಧಿಕೃತ ಪಾಲಿಸಿ ದಾಖಲೆಗಳನ್ನು (Policy Documents) ಕೂಲಂಕಷವಾಗಿ ಪರಿಶೀಲಿಸುವುದು ಸೂಕ್ತ.
=================
ಎಲ್‌ ಐಸಿಯ ಪಾಲಿಸಿಗಳು ಹೇಗೆ ವಿಶ್ವಾಸಾರ್ಹವೇ?
ಎಲ್ಐಸಿ (Life Insurance Corporation of India) ಪಾಲಿಸಿಗಳು ಅತ್ಯಂತ ವಿಶ್ವಾಸಾರ್ಹ ಹಾಗೂ ಸುರಕ್ಷಿತವಾಗಿವೆ. ಭಾರತೀಯ ಹಣಕಾಸು ಕ್ಷೇತ್ರದಲ್ಲಿ ಎಲ್ಐಸಿ ಮೇಲಿನ ಜನರ ನಂಬಿಕೆ ಸಾಟಿಯಿಲ್ಲದ್ದು. ಇದಕ್ಕೆ ಕಾರಣಗಳಿವೆ.
ಎಲ್‌ಐಸಿಗೆ LIC ಕಾಯಿದೆ, 1956ರ ಸೆಕ್ಷನ್ 37 ರ ಅಡಿಯಲ್ಲಿ ಕೇಂದ್ರ ಸರ್ಕಾರವು ‘ಸಾರ್ವಭೌಮ ಗ್ಯಾರಂಟಿ’ (Sovereign Guarantee) ನೀಡಿದೆ. ಎಲ್ಐಸಿ ನೀಡುವ ಪಾಲಿಸಿಯ ಮೂಲ ಮೊತ್ತ (Sum Assured) ಮತ್ತು ಅದಕ್ಕೆ ಸೇರ್ಪಡೆಯಾಗುವ ಬೋನಸ್‌ಗಳಿಗೆ ಭಾರತ ಸರ್ಕಾರವೇ ಅಂತಿಮ ಜವಾಬ್ದಾರಿಯಾಗಿರುತ್ತದೆ.
ಎಲ್‌ಐಸಿಯ ಕ್ಲೈಮ್ ಸೆಟಲ್ಮೆಂಟ್ ಅನುಪಾತವು 98% ಕ್ಕಿಂತ ಹೆಚ್ಚಿರುತ್ತದೆ. ಅಂದರೆ ಸಲ್ಲಿಕೆಯಾಗುವ ಬಹುತೇಕ ಎಲ್ಲ ಸಮಂಜಸ ಕ್ಲೈಮ್‌ಗಳನ್ನು ನಿಗದಿತ ಅವಧಿಯಲ್ಲಿ ವಿಲೇವಾರಿ ಮಾಡಲಾಗುತ್ತದೆ.
=============
ಗ್ರಾಹಕರು ಗಮನಿಸಬೇಕಾದ ಸಂಗತಿ:
ಎಲ್ಐಸಿ ವಿಶ್ವಾಸಾರ್ಹವಾಗಿದ್ದರೂ, ಪಾಲಿಸಿ ಆಯ್ಕೆ ಮಾಡುವಾಗ ಕೆಳಗಿನ ಅಂಶಗಳನ್ನು ಗಮನಿಸುವುದು ಅಗತ್ಯ:
ನಿಮ್ಮ ಅಗತ್ಯಕ್ಕೆ ತಕ್ಕ ಯೋಜನೆ ಆಯ್ಕೆ ಮಾಡಿ: ಹಣವನ್ನು ಬೆಳೆಸಲು (Wealth Creation) ಅಥವಾ ಶುದ್ಧ ಜೀವ ವಿಮೆಗೆ (Term Insurance) ನಿಮ್ಮ ಗುರಿ ಏನು ಎಂಬುದನ್ನು ಆಧರಿಸಿ ಸರಿಯಾದ ಪಾಲಿಸಿ ಆಯ್ಕೆ ಮಾಡಬೇಕು.
ಎಲ್‌ಐಸಿಯ ಯುಲಿಪ್ ಯೋಜನೆಗಳ ಆದಾಯವು ಮಾರುಕಟ್ಟೆಯ ಏರಿಳಿತಕ್ಕೆ ಒಳಪಟ್ಟಿರುತ್ತದೆ (ಇದರಲ್ಲಿ ಸರ್ಕಾರದ ಗ್ಯಾರಂಟಿ ಇರುವುದಿಲ್ಲ).
ಪಾಲಿಸಿ ಪಡೆಯುವಾಗ ನಿಮ್ಮ ಆರೋಗ್ಯ ಮತ್ತು ಆದಾಯದ ಕುರಿತು ನಿಖರವಾದ ಮಾಹಿತಿ ನೀಡಿದರೆ, ಕ್ಲೈಮ್ ಮಾಡುವಾಗ ಯಾವುದೇ ತೊಂದರೆಯಾಗುವುದಿಲ್ಲ.
